Даночната управа на Хрватска објави податоци за бројот и вредноста на сметките издадени за време на вчерашниот голем бојкот на продавниците, маркетите и бензиските пумпи. Во меѓувреме, платформата „Ало, инспекторе“ веќе најавува понатамошни активности.
Низ државата биле издадени вкупно 5.074.278 сметки во вредност од речиси 78 милиони евра. Од тој број, 3.097.636 се издадени во продавниците.
Тоа е речиси два милиона помалку сметки од претходниот петок. Дополнително, податоците покажуваат дека вредноста на овие сметки е нешто повеќе од 52 милиони евра, што е за цели 34 милиони евра помалку од четвртокот. Граѓаните во петокот оставиле 10,5 милиони евра во угостителството, а во другите дејности 15,5 милиони евра, пренесува „Danas.hr“.
Иако малопродажните синџири главно одбиваа да коментираат за бојкотот, по празните продавници, некои се огласија, нагласувајќи дека редовно нудат попусти и промоции за муштериите.
„Преку континуирани акции, се стремиме да ги задоволиме потребите на нашите клиенти што е можно повеќе. Оваа недела, на пример, нудиме повеќе од 1.800 артикли на акција, вклучително и некои артикли кои се предмет на владини мерки, кои во моментов ги нудиме по цени пониски од пропишаните“, соопштиле од Кауфланд.
На социјалните мрежи веќе почнаа да се шират повици за бојкот на одредени трговски ланци, во траење од една недела. Од платформата „Ало инспекторе“ самите ги најавуваат следните потези во кои ќе ги вклучат граѓаните.
„Нашиот следен чекор е да анализираме се што се случува. После тоа, ќе ги поканиме потрошувачите да предложат следни чекори. Потоа ќе процениме дали се работи за бојкот на малопродажен синџир, за бојкот на трговски центар, за бојкот на повеќе производи, бидејќи тоа е можеби најмоќната алатка во контролата на цените или се работи за нешто сосема друго. Во секој случај, мора да се разговара и за ДДВ“, заклучува Јосип Келемен, советник на платформата за потрошувачи „Ало, инспекторе“.