Многу е можно Русите да извршат напад врз нас, Русија е подготвена да употреби помеѓу 7 и 9 милиони дронови оваа година, предупреди комесарот за одбрана на ЕУ, Ендрус Кубилиус, во говорот пред учесниците на настан во Брисел организиран од Форум Европа. Војната во Иран може да нè погоди не само со повисоки цени на енергијата, туку и со ракетни напади, додаде тој, цитиран од БТА.
Кубилиус истакна дека минатата недела генералниот секретар на НАТО, Марк Руте, укажал на потребата од четирикратно зголемување на капацитетите на европската воздушна одбрана (ADF). Европскиот комесар додаде дека само во првите денови од нападите врз Иран и последователниот одговор на Техеран со лансирање балистички ракети и дронови, биле потребни толку ракети за воздушна одбрана колку што произведуваат САД за една година.
„Ни треба независно европско производство на ракети. За да имаме безбедност, мора да бидеме силни и независни. Европа мора да може да се брани, да инвестира во средства за заштита на демократијата, територијата и нашиот начин на живот“, рече европскиот комесар.
Според него, европските сојузници мора да преземат мерки за замена на 100 илјади американски војници во Европа, откако „трансатлантските партнери го префрлаат своето внимание“ кон Тихиот и Индискиот Океан. САД сакаат Европејците да ја преземат одговорноста за сопствената одбрана, немаме причина да не се согласуваме со ова барање, коментираше Кубилиус.
Засега, мирот не е на повидок во Украина, истакна еврокомесарот и се повика на податоци од студија, според која губењето на Киев во војната би ја чинело Европа двојно повеќе од обезбедувањето поддршка. Според него, начините на донесување европски одлуки повеќе не одговараат на промените во светот.
Додаде дека денес руските вооружени сили се посилни отколку пред нападот врз Украина.