Шведска често се наведува како светски лидер во прашањата за родовата еднаквост. Меѓутоа, кога станува збор за брачните традиции, трендовите се чини дека малку се разликуваат. Традиционално, во Шведската лутеранска црква, невестата и младоженецот одат заедно до олтарот, за разлика од британската и американската практика каде невестата често е придружувана од нејзиниот татко. Но, во последниве години – можеби под влијание на глобалната телевизија, филмовите и социјалните мрежи – се повеќе Швеѓанки сакаат нивните татковци да ги „предадат“ на нивната свадба.
„Холивудска традиција?
Ова прашање, кое некои Швеѓани го нарекоа „холивудска традиција“, веќе некое време е предмет на дебата. Особено се најде во центарот на вниманието во 2010 година, кога шведската престолонаследничка принцеза Викторија реши нејзиниот татко, кралот Карл Густаф, да ја прошета по патеката. Неодамна дебатата повторно ескалира, пишува „Гардијан“, откако на есенскиот собир на Шведската црква бил поднесен предлог да се забрани практиката на предавање на невестата од страна на таткото.
Сара Валденфорс, пасторка од Нилосе во Гетеборг, која ја предложи оваа забрана заедно со Јеспер Енерот, истакнува дека е важно да се препознае патријархалната симболика што ја носи таквата практика.
„Релативно новиот тренд таткото да ја донесе невестата до олтарот и да му ја предаде на новиот сопруг не е во согласност со нашата црковна традиција“, вели Валденфорс.
„Иако тој момент може да им изгледа убав на младенците, не можеме да го игнорираме она што го симболизира: татко предава малолетно девојче на својот нов старател.
Жестока дискусија
Според шведската традиција, невестата и младоженецот одат заедно до олтарот. Одлуката дали невестата може да оди со таткото е на свештениците лично. Валденфорс, член на опозициските социјалдемократи, смета дека е клучно шведската црква да ја преземе одговорноста за прашањето за свадбената литургија, додавајќи дека е задоволна што предлогот ја покренал посакуваната дебата, пишува „Вечерњи лист“.
Од друга страна, некои членови на црквата не се согласуваат со предлогот. Хенрик Лов, извршен комесар од Јонкопинг, смета дека станува збор за овозможување на семејството да се вклучи во церемонијата, а не за „правно и патријархално пренесување“.
„Предавањето на невестата станува сè попопуларно во последните 10 до 15 години, веројатно поради влијанието на Холивуд, но и поради венчавката на престолонаследничката принцезата Викторија, каде кралот малку прошета со неа до олтарот“, рече Лов.
Тој додаде дека таквите случаи не се многубројни – околу 10% од паровите со кои прави свадби одат до олтарот со мајка им или татко им. Дебатата се одвива бидејќи допира две важни шведски вредности: родова еднаквост и слобода на избор. На крајот, Лов се сомнева дека предлогот за забрана ќе биде успешен, бидејќи социјалдемократите нема да најдат доволно поддршка од другите групи.
Инаку, дебатата се води и покрај намалувањето на бројот на свадби во Шведска. Минатата година се венчале 44.190 парови, додека во 2012 година тој број бил 56.240.