Полска го прекрши правото на почитување на приватниот живот со тоа што законски не ги признава истополовите партнерства, одлучи Европскиот суд за човекови права, со што се врши притисок врз новата влада на Доналд Туск брзо да го промени законот.
Десетици Полјаци тврдеа дека повеќето членки на Советот на Европа им дозволуваат на истополовите парови да стапуваат во брак или да регистрираат партнерства и дека затоа се во нееднаква положба во областа на социјалните права и семејното право.
„Полската држава не ја исполни својата должност да им обезбеди на тужителите специфична правна рамка за признавање и заштита на истополовите партнерства“, објави судот. „Тој неуспех резултираше со неспособност на тужителите да ги регулираат основните аспекти од нивниот живот и го повреди нивното право на почитување на приватниот и семејниот живот“ се додава.
Случајот датира од владеењето на националистичката партија Право и Правда (ПиС), кое заврши во понеделникот, откако парламентот ја потврди новата проевропска влада на Доналд Туск. ПиС вели дека проширувањето на бракот и дозволувањето на геј паровите да посвојуваат деца го загрозува традиционалното семејство и им штети на децата, а дека подучувањето на ЛГБТ теми во училиштата ги сексуализира децата.
Туск во кампањата најави дека неговата партија ќе воведе истополови партнерства и дека ова прашање е приоритет.
Пресудите на Европскиот суд за човекови права се обврзувачки за членовите на Советот на Европа.