Фејсбук и Инстаграм соопштија дека се основачки членови на Take It Down, нова платформа дизајнирана проактивно да го спречи ширењето на интимни слики на младите на интернет.
Поддржано од Националниот центар за исчезнати и експлоатирани деца (NCMEC) и двете социјални мрежи (и двете во сопственост на „Мета“), Take It Down е бесплатна платформа која е дизајнирана да помогне да се спречи објавувањето на интимни фотографии на младите луѓе на интернет.
Без разлика дали е добра идеја или не, тинејџерите споделуваат голи фотографии. Take It Down наведува дека иако не е можно да се вратите назад во времето и да го притиснете копчето за неиспраќање, неговата услуга може барем да помогне да се спречи тие фотографии да бидат објавени на интернет и да се шират.
„Од 2019 година, извештаите за онлајн експлоатација и измачување на деца се речиси двојно зголемени. Иако не можете да го промените она што е направено, ние можеме да помогнеме да ги отстраниме вашите експлицитни фотографии и да продолжите понатака“, стои во соопштението на Take It Down.
Бесплатната услуга помага да се отстрани или запре онлајн споделувањето на голи, делумно голи или сексуално експлицитни фотографии или видеа што биле снимени кога некое лице било помладо од 18 години.
„Можете да останете анонимни додека ја користите услугата и нема да мора да ги испраќате вашите слики или видеа на никого. Take It Down ќе работи на јавни или нешифрирани онлајн платформи кои се согласиле да учествуваат“, објаснува Take It Down.
„Можеби сте испратиле слика некому, но сега ви се закануваат или ја објавиле некаде. Дури и ако не сте сигурни дали сликата е споделена, но сакате помош за да се обидете да ја отстраните од местата на кои може да се појави на интернет, оваа услуга е за вас“, додаваат оттаму.