Ги осудувам сите случки во кои се зема пари за интервенција. Тоа не е начин да се функционира во било кој систем, па и во нашиот здравствен систем. Секаде има санкции за таквите постапки. Се обидуваме со сите наши мерки да ги стимулираме лекарите, со зголемување на платите, на дежурствата и со таа тенденција и со тие политики ќе продолжиме и во иднина.
Ова денеска го изјави министерот за здравство Венко Филипче, одговарајќи на новинарско прашање за оставката на заменик-министерот за здравство Асим Муса, кој денеска на прес-конференција рече дека се повлекува од функцијата, откако во медиумите беше објавена видео снимка на која се гледа како тој наводно прима пари од пациент од Албанија за хируршка интервенција.
– Треба да имаме неселективен пристап без оглед на функциите кои ги имаме. Институциите треба да си преземат санкции доколку сметаат дека за тоа има простор за кого било, додаде Филипче по прес-конференцијата на Здружението на бубрежно болни граѓани „Нефрон“.