Германски Фолксваген очекува следните две години да бидат тешки на висококонкурентниот кинески пазар на автомобили. Конкуренцијата се засили по уште еден бран на намалувања на цените во април, а таквата ситуација би можела да продолжи и во наредните години, изјави во Пекинг членот на одборот на VW, Ралф Брандстатер, пред големиот саем за автомобили.
Според него, многу производители на исклучиво електрични автомобили значително ги намалиле своите профитни маржи во последниве години, „па тоа води кон консолидација на пазарот“. Тој посочи дека компаниите со помал обем на продажба, помалку од 100.000 возила годишно, нема да ја преживеат претстојната конкуренција, пренесе Seebiz.
Фолксваген планира да се подготви за жестока ценовна конкуренција во следните две години и ќе го финансира развојот на својот бизнис со е-автомобили во Кина со продажба на возила со мотори со внатрешно согорување, кои продолжуваат добро да се покажуваат.
Фолксваген можеби ќе мора да прифати пониски продажни бројки за да ги одржи цените, што веројатно ќе значи губење на пазарниот удел на краток рок. Компанијата планира да се врати на исто ниво со кинеската конкуренција во однос на трошоците и технологијата, почнувајќи од 2026 година за почетни компактни автомобили.
Цената на платформите за возила развиени за Кина треба да се намали за 40 проценти. До 2030 година, групацијата Фолксваген, која вклучува брендови како Ауди и Порше, како и Фолксваген, има за цел да продаде околу четири милиони возила во Кина, а половина од продадените автомобили ќе бидат електрични.
VW проценува дека тоа би одговарало на пазарен удел од 15 проценти.