Европските сателити регистрираа загрижувачки тренд во северниот дел на Јадранското Море. Овој месец, европските сателити открија промена на нивото на морето долж северниот јадрански брег. Некогаш убавото сино море стана матно зелено. Причината? Цветаат алгите.
Според сателитските снимки објавени од програмата Коперник на социјалните мрежи, морското цветање главно го погоди северниот италијански брег.
„Живописните зелени површини на сликата се во остар контраст со потемната сина боја на чистата вода“, напишаа тие.
Научниците веруваат дека ненадејното и обилно цветање, видливо од вселената, е поврзано со невообичаено високите температури на морето и обилни врнежи од дожд што го зголемиле протокот на реките во морето.
Во соопштението, Коперник, исто така, предупреди дека цветањето на алгите може да биде многу опасно за морскиот свет, бидејќи го намалува нивото на кислород. Исто така, влијае и на риболовот и туризмот.
Што е „морско цветање“?
Морското цветање е размножување на планктонски алги до неколку милиони клетки на литар морска вода, што е резултат на поволни услови, како што се доволно високи концентрации на хранливи материи во водата и доволна сончева светлина. Цветот може да ја обои водата црвена, зелена, кафеава, во зависност од доминантната боја што се наоѓа во клетките. Цветањето е природен феномен кој е генерално добредојден. Фитопланктонот е она што ги храни другите организми и е основа на морските синџири на исхрана.
Сепак, главниот проблем со прекумерното цветање е тоа што може да доведе до недостаток на кислород за време на распаѓањето, а некои видови фитопланктон се токсични или на друг начин штетни, што може да им наштети на организми како што се школките и рибите, пренесува N1info.si.