Франција во вторникот ја обвини Русија за серија сајбер напади врз француските институции и настани, вклучувајќи ги Олимписките игри од минатата година и изборите во 2017 година. Француското Министерство за надворешни работи изјави дека нападите се спроведени од страна на групата АПТ28, која се смета за блиска со руската воена разузнавачка служба. Во соопштението се наведува дека десетина француски институции биле цел на сајбер напади од 2021 година наваму, вклучувајќи јавни служби, приватни компании и спортски организации поврзани со организацијата на Олимписките и Параолимписките игри во 2024 година.
Претходно, руското воено разузнавање го саботирало телевизискиот канал TV5Monde во 2015 година и се обидело да ги дестабилизира француските избори во 2017 година. Франција ги осудува овие напади, нагласувајќи дека тие претставуваат сериозна закана за нејзините национални интереси и демократија. Франција, во соработка со своите партнери, изрази решителност да ги искористи сите достапни средства за да се спротивстави на злонамерните сајбер напади кои доаѓаат од Русија.
„Ваквите дестабилизирачки активности се неприфатливи и недостојни за постојана членка на Советот за безбедност на ОН“, се додава во соопштението на француското Министерство.
Освен Франција, многу други европски земји исто така биле цел на руското воено разузнавање во последниве години. Германија верува дека групата АПТ28 е одговорна за голем сајбер напад врз Бундестагот во 2015 година и за напад врз седиштето на Социјалдемократската партија во 2023 година.