Претседателот на македонското Собрание, Африм Гаши, во интервју за „Дојче веле“ од Берлин изјави дека нема проблем Бугарите да бидат дел од Уставот на Северна Македонија, но посочи дека е потребно да се добијат гаранции дека „нема да има следен услов веднаш по тоа“.
„Немаме никаков проблем со тоа Бугарите да бидат дел од Уставот, но, очекуваме гаранции дека веднаш потоа нема да има следен услов,“ изјави Гаши.
Гаши истакна дека Скопје сака процесот за пристапување во ЕУ да продолжи што побргу, особено по официјалниот старт на преговорите на Албанија минатата недела. Тој го нагласи проблемот со „предвидливоста на процесот“ и потенцираше дека „нема дилема“ во владата дека земјата треба да го продолжи европскиот пат. „Нашиот проблем е со предвидливоста на процесот, и гаранциите дека веднаш потоа ќе нема следно прашање или следен услов кој се однесува на историски и идентитетски прашања,“ вели Гаши.
На прашањето дали Германија би можела да се вклучи како посредник, Гаши рече дека Северна Македонија и Бугарија имаат капацитет сами да постигнат договор, но додаде: „Секако, секаква помош е добредојдена за нас… за нас е битно процесот на евроинтеграција да продолжи што побргу.“
Гаши исто така истакна дека, иако идентитетските прашања не ги засегаат Албанците директно, сите етнички заедници заедно стојат во одбрана на македонскиот идентитет и евроинтеграцијата на земјата.