Рускиот државен концерн за гас „Газпром“ во петокот ги отфрли обвинувањата дека испраќа недоволни количини гас во Европа, велејќи дека испорачува рекордни количини.
„Снабдувањето со гасоводи од Русија до Европа во 2021 година е на историски највисоко ниво, а „Газпром“ го зголеми производството на гас за 18,4 проценти во споредба со минатата година. Обвинувањата дека „Газпром“ не ја снабдува Европа со доволни количини гас се апсурдни“, вели Сергеј Комлев, шеф на одделот за договори и цени на „Газпром експорт“, во напис за корпоративниот магазин на „Газпром“.
Тој тврди дека Европа го зголемила увозот на гас во првата половина од оваа година за 31,5 милијарди кубни метри или 33 проценти во споредба со истиот период минатата година, а истовремено го зголемила увозот на руски гас за 17,2 милијарди кубни метри или 22 проценти.
„Испораките на гас на „Газпром“ се на историски највисоко ниво, а поголемиот дел од растот е поврзан со најважните потрошувачи“, пишува Комлев.
Тој ги наведе Германија, Турција и Италија како главни потрошувачи.
Производството на „Газпром“ до крајот на јули, според првичните податоци, достигна 298,2 милијарди кубни метри гас, што е за 18,4 проценти повеќе отколку во истиот период минатата година.
„Во исто време, извозот се зголеми за 23,2 проценти, а испораките во странство на 115,3 милијарди кубни метри. Овие податоци ја докажуваат апсурдноста на обвинувањата на „Газпром“ за недоволно снабдување “, заклучи Комлев.