Мнозинството германски граѓани ја поддржуваат идејата за повторно воведување на данокот на богатство што беше укинат пред речиси 30 години. Според истражувањето на „Форса“ за „Стерн“, 62 отсто од испитаниците се за, а 34 отсто се против, пренесува dpa.
Поголемиот дел од поддржувачите се меѓу гласачите на зелените, 84 отсто од нив. Следат симпатизерите на Социјалдемократската партија (СПД) со 79 отсто.
Изненадувачки е што мнозинството од гласачите на Христијанско-демократскиот блок (ЦДУ/ЦСУ), 55 отсто од нив, се изјаснија за.
Демохристијаните, сепак, цврсто ја отфрлаат идејата и ја вклучија во нивната заедничка изборна програма: данокот „ќе ја загрози суштината на германската економија и ќе чини многу работни места“.
Овој данок е јасно отфрлен од гласачите на либералната ФДП – 78 отсто од испитаниците биле против. Меѓу гласачите на десничарската Алтернатива за Германија (AfD), 62 отсто се против данокот.
„Форса“ анкетираше 1.008 граѓани за истражувањето.
Воведување данок на богатство бара, меѓу другото, и Германското социјално друштво.
„Германија нема проблем со потрошувачката, туку со приходите“, изјави директорката на Здружението Михаела Енгелмаер.
Според неа, „супербогатите“ треба построго да се оданочуваат.
Уставниот суд го укина данокот на богатство во 1997 година. Ова, сепак, не ја смири поларизираната јавна дебата на оваа тема.