Премиерот на германската сојузна држава Мекленбург-Западна Померанија, Мануела Швезиг, планира да отвори посебен фонд за заштита на климата со цел да се заобиколат санкциите предложени од САД на гасоводот „Северен тек 2“, објави германскиот весник „Билд“, повикувајќи се на свои извори.
Според неа, идејата е Фондот за заштита на климата да го класифицира „Северен тек 2“ како „една од најважните компоненти за заштита на животната средина во Мекленбург-Западна Померанија“.
Покрај тоа, организацијата, која се формира, треба да послужи за успешно завршување на проектот. Според списокот, за да го реализира тоа, фондот има намера да создаде специјализирана трговска компанија чии производи и услуги ќе се користат исклучиво за изградба на гасоводот „Северен тек 2“.
„Билд“ посочува дека германските компании, на кои им се закануваат американски санкции, на тој начин ќе соработуваат со руската страна преку економски инструменти обезбедени од фондот. Според весникот, од техничка гледна точка, ниту една компанија нема директно да соработува со „Северен тек 2“. Во овој поглед, тие нема да бидат предмет на санкции од САД.
Претходно беше најавено дека работите на „Северен тек 2“, во германските води, ќе продолжат на 5 декември.
Да потсетиме, проектот подразбира изградба на два краци на гасоводот, чиј вкупен капацитет ќе изнесува 55 милијарди кубни метри гас годишно, од брегот на Русија, преку Балтичко Море, до Германија. Бројни европски компании учествуваат во изградбата на гасоводот. Украина активно се бори против изградбата на гасоводот „Северен тек 2“, стравувајќи дека ќе ги изгуби приходите од рускиот транзит на гас, како и бројни европски земји, вклучувајќи ги Полска, Латвија и Литванија, како и САД, кои сакаат да го продаваат својот течен природен гас на ЕУ.
Соединетите држави веруваат дека ова е политички проект што ја загрозува енергетската безбедност на Европа. Руската страна постојано изјавуваше дека проектот е апсолутно комерцијален и конкурентен и посочи дека не подразбира прекинување на транзитот на руски гас преку Украина кон ЕУ.