Германскиот извоз на оружје во 2024 година ги собори сите претходни рекорди, достигнувајќи рекордни 13,2 милијарди евра, покажуваат официјалните податоци објавени доцна во средата.
Сојузното министерство за економија соопшти дека Украина и понатаму е најголем примател на германско оружје, со 8,1 милијарди евра или 62 отсто од вкупниот одобрен извоз, јавува AA.
– Овие бројки покажуваат дека ние цврсто стоиме на страната на Украина во нејзината одбрана од руската агресивна војна. Воената помош за Украина е и во интерес на нашата безбедносна политика – се вели во соопштението на Министерството.
Годишниот извоз на оружје на Германија го надмина претходниот рекорд од 12,2 милијарди евра поставен во 2023 година. Вкупниот извоз беше речиси 8,1 милијарди евра за воено оружје и 5,1 милијарди за друга воена опрема.
По Украина, главни приматели биле Сингапур со 1,2 милијарди евра, Алжир со 559 милиони евра и САД со речиси 299 милиони евра.
Податоците, исто така, открија континуиран извоз на оружје во Израел, и покрај зголемените повици Берлин да воведе ембарго за оружје.
Според официјалните податоци, Берлин во 2024 година му одобрил на Израел воена опрема вредна 161 милион евра. Германската влада привремено ја суспендираше испораката на оружје за Израел во март, но ја продолжи испораката неколку месеци подоцна, откако доби гаранции од Тел Авив за тоа како ќе се користи.