Германскиот министер за одбрана Борис Писториус го критикуваше американскиот претседател Доналд Трамп за тоа што не успеал да преговара со рускиот лидер Владимир Путин.
Иако Трамп објави примирје и крај на војната, двочасовниот разговор со Путин на крајот резултираше со тоа што Русија се обврза да „подготви меморандум за мировни преговори“ со Украина.
Како реакција на овој исход, Писториус го критикуваше Трамп, велејќи дека тој „погрешно ја проценил својата позиција и влијанието што го има кај Путин“.
„Се плашам дека тој целосно погрешно ја процени преговарачката позиција“, изјави Писториус за германското радио Дојчландфунк.
Откако Европската Унија го усвои 17-тиот пакет санкции против Русија, Писториус рече дека „не е сигурен“ дали Америка ќе се придружи на овие мерки против режимот на Путин.
Да се потсетиме дека Трамп во изборната кампања изјави дека „ќе ја запре војната во Украина за 24 часа“, но веќе три месеци преговара безуспешно, дури и со промена на ставот кон Русија.
Иако неколку пати сугерираше дека Путин е „подготвен за мир“, Русија постојано одбиваше да ги прифати украинските предлози за примирје.