Гласачите на американската сојузна држава Џорџија денеска гласаат во вториот круг од изборите за Сенатот, од што зависи дали демократите или републиканците ќе имаат контрола над горниот дом на Конгресот на САД.

Бидејќи контролата врз Сенатот има значително влијание врз шефот на државата, резултатот од денешните избори одредува дали новоизбраниот претседател на САД, демократот Џозеф Бајден, кој стапува на должност на 20 јануари, ќе може да ја спроведе својата прогресивна агенда во следните две години или да се соочи со блокада од Републиканците.

На изборите на 3 ноември, демократите ја освоија Белата куќа и го задржаа мнозинството во Претставничкиот дом на САД.

Гласачите во Џорџија го имаат клучот за контрола над американскиот Сенат, во кој секоја од 50-те сојузни држави има по двајца претставници. Една третина од членовите на Сенатот се избираат на секои две години, а мандатот на сенаторот трае шест години.

По изборите во ноември, на кои граѓаните го избраа целиот Претставнички дом и 35 од 100 членови на Сенатот, републиканците имаат 50, а демократите 48 од 100 сенатори.

За да ја добијат контролата врз Сенатот, демократите мора да ги освојат и сенаторските места во Џорџија.

Тогаш, односот на силите би бил 50 спрема 50, и во тој случај, одлучувачки е гласот на претседателот на Сенатот, што по функција е потпретседателот на САД.

Благодарение на победата на Бајден на претседателските избори, потпретседателката на САД ќе биде сенаторка на демократите, Камала Харис, кој ќе претседава со Сенатот од 20 јануари.

Џорџија не избрала сенатор од редовите на Демократската партија во последните 20 години.

За острата поделба на демократи и републиканци во Џорџија сведочи блискиот резултат на претседателските избори и фактот дека Бајден беше прогласен за победник дури по пребројувањето.

Дури и ако демократите ги добијат двата дуели во Џорџија, Бајден нема да може да спроведе сè што сака, бидејќи е потребно три петтини од мнозинството од 60 сенатори за промена на најважните закони, според „Асошиејтед Прес“.