Американскиот рапер Тупак Шакур постхумно ќе добие ѕвезда на Булеварот на славните во Холивуд, 26 години по неговата смрт.
На хип-хоп ѕвездата ќе ѝ биде оддадена почит со церемонија на престижната патека во Лос Анџелес на 7 јуни, а од холивудската Комора на режисери за „Ел Еј Тајмс“ потврдиле дека раперот ќе добие постхумно признание. Шакур, чија ѕвезда ќе биде 2758 на Булеварот на славните е рапер роден во Њујорк кој силно влијаеше на хип-хопот, особено на рап-сцената на западниот брег.
Секива „Сет“ Шакур, сестрата на Тупак, ќе ја прифати честа во негово име за време на свечената церемонија на откривање на неговата ѕвезда. Водителот од Лос Анџелес, Биг Бој ќе ја води церемонијата, додека режисерот Ален Хјуз и писателот Џамал Џозеф ќе говорат на настанот.
Шакур, чие уметничко име беше „2Pac“ и кој се смета за еден од најголемите музичари во историјата, го издаде својот деби албум во 1991 година и продолжи да ужива во успехот на топ листите со хитови како „California Love“, „All Eyez on Me“, „Changes“ и „I Ain’t Mad at Cha“.
Почина на 13 септември 1996 година, кога имаше само 25 години, откако беше застрелан со четири куршуми во Лас Вегас. Во 2004 година, неговиот постхумен сингл „Ghetto Gospel“ кој содржи примероци од песната „Indian Sunset“ на Елтон Џон, го достигна првото место на топ-листата за синглови во Велика Британија.