Европа почнува да ги отвора градовите и плажите откако вакцинирани се скоро третина од возрасните и се намалува бројот на инфекции со Ковид-19, што ги зголемува надежите дека сезоната на летни годишни празници може да се спаси пред да биде предоцна.
Расположените Шпанци скандираа „слобода“ танцувајќи на улиците откако во поголемиот дел од земјата беше укинат полицискиот час за време на викендот, додека Грција ги отвори јавните плажи – со лежалки на безбедно растојание. Со испорачана 200 милиони дози на вакцина, ЕУ е на пат да ја исполни својата цел да вакцинира 70 проценти од возрасната популација до лето, објави на Твитер претседателката на Европската комисија Урсула фон дер Лејен во неделата.
И во Германија, првиот сончев викенд го подигна расположението откако министерот за здравство Јенс Шпан објави дека конечно е разбиен третиот бран на пандемијата. Но, тој предупреди дека „расположението е подобро од реалноста“. Националната седумдневна инциденца на случаи со коронавирус на 100.000 жители останува висока – 119, рече Шпан. „Тоа значи дека е уште поважно да се задржи брзината на кампањата за вакцинација“.
Седумдневната инциденца на ниво на ЕУ е 185, според податоците. Ова е многу повеќе отколку во земји како Израел (6), Велика Британија (31) или САД (123) кои имаат успех во своите кампањи за вакцинација. Првичната предност на Британија е поради раните нарачки, одобрувањето на вакцините и давањето на првите дози на многу луѓе. Премиерот Борис Џонсон се очекува да започне нова фаза на мерки за олеснување во Англија и да даде зелено светло за „претпазлива прегратка“ и да им дозволи на пабовите да служат пијалоци во објектите по повеќемесечни строгимерки.
„Податоците го одразуваат она што веќе го знаевме – нема да дозволиме вирусот да нè победи“, рече Џонсон пред официјалното соопштение подоцна во понеделникот. Доставувањето вакцини првично беше побавно во ЕУ, која се одлучи за централизирана стратегија за набавки. Со релативно доволни дози на Pfizer / BioNTech и Moderna, покриеноста со вакцинациите во Европа сега расте, додека земјите кои првично напредуваа бргу, сега забавуваат бидејќи наидуваат на неодлучност од оние кои сè уште не биле вакцинирани.
Околу 31,6 проценти од возрасните во 30 европски земји ја примиле првата доза на вакцина и 12 проценти од двете дози, објави Европскиот центар за превенција и контрола на болести. Франција очекува да распредели 20 милиони први дози до средината на мај и 30 милиони до средината на јуни. Франција планира да го укине полицискиот час и да им дозволи на кафулињата, баровите и рестораните да работат на тераси од 19 мај, бидејќи се намалува бројот на инфекции и зафатеноста на одделите за интензивна нега.
Подготовка на туристичката сезона
Подоброто снабдување со вакцини им даде на земјите поголема слобода да ги прилагодат своите стратегии во борбата против Ковид-19 следејќи ги извештаите за многу ретки, но понекогаш и фатални згрутчувања на крвта кај луѓе вакцинирани со АстраЗенека или Џонсон и Џонсон.
Германија одлучи и двете вакцини да им бидат достапни на оние што ги сакаат, се додека нивниот лекар ги советува – понуда наменета за помлади возрасни лица кои инаку би требало да чекаат на својот ред. Норвешката комисија за вакцинација објави сличен повик во понеделникот, во кој се наведува дека АстраЗенека или Џонсон и Џонсон треба да бидат достапни за волонтерите. Некои италијански региони исто така ги нудат обете вакцини на лица под 60 години.
Со оглед на тоа што некои влади го скратија периодот помеѓу дозите, а во јуни се планира воспоставување на дигиталниот систем за „зелени пасоши“ за патниците кои ќе имаат потврди за вакцинирање, луѓето конечно се осмелуваат да планираат годишни одмори.
„Полагаме надежи во туризмот“, рече Никос Венијерис, кој управува со плажа во Алимос, предградие на Атина. Туризмот претставува околу една петтина од грчката економија и работни места и земјата не може да си дозволи уште едно изгубено лето. Грција ги укинува ограничувањата за вакцинираните туристи од 15-ти мај.