Министерството за надворешни работи на Израел објави дека едрилица со активисти и мала количина хуманитарна помош, која се обидела да стигне до Појасот Газа, е пресретната и сега се упатува кон израелско пристаниште. На бродот „Мадлин“ се наоѓаат 12 лица, меѓу кои шведската климатска активистка Грета Тунберг и еден француски пратеник. Израелските власти ја опишаа едрилицата како „селфи едрилица“ и нагласија дека помошта што ја носела е многу мала, „помалку отколку што би се сместило во еден камион“. Сите активисти ќе бидат депортирани од Израел.
Коалицијата „Флотила на слободата“, која стои зад едрилицата „Мадлин“, соопшти дека работи на лоцирање на екипажот, откако израелските власти ги однеле активистите во притвор. Според нив, бродот никогаш не влегол во израелски територијални води и имал намера да стигне до палестинските води.
Правниот центар „Адалах“, кој ги застапува правата на арапското малцинство во Израел, побара итно откривање на локацијата на активистите и нивна правна заштита. Тие најавија и правни мерки за ослободување на активистите, тврдејќи дека Израел нема право да го заплени бродот во меѓународни води.
Од своја страна, организацијата „Амнести Интернешнл“ ги критикува израелските постапки и ја нарекува блокадата на Газа нехумана, посочувајќи дека Израел има обврска да обезбеди безбедност и хуманитарен пристап до цивилите во Појасот Газа.
Израелскиот портпарол Дејвид Менсер, пак, на прес-конференција истакна дека активистите добиле храна и вода, а помошта што ја носела едрилицата ќе биде испратена до Газа. Тој ја нарече акцијата „селфи едрилица“ и ја оцени како обид за промоција на личен активизам, а не сериозна хуманитарна мисија.
Во меѓувреме, од Тунис се упатува голем конвој од околу 1.000 лица, кој има намера да ја пробие израелската блокада на Газа. Конвојот, именуван „Сумон“ (што на арапски значи „стабилност“), се состои од девет автобуси и планира да стигне до јужната палестинска територија преку Либија и Египет. Меѓутоа, засега не се добиени дозволи од египетските власти за премин низ нивната територија. Организаторите најавија дека ќе продолжат со обидите, очекувајќи поддршка особено од Либија.