Груевски:СДСМ се обидува да ја замагли аферата со фалсификуваните лични карти

Премиерот Никола Груевски директно го обвини врвот на опозициската СДСМ за наводна вмешаност во аферата со фалсификуваните лични карти.

Според него се што досега било изјавено за овој случај е, како што рече, само обид да се замагли фактот дека биле фатени во криминал и дека всушност опозицијата ја користела опремата да фалсификува лични карти.

На последната седница за пратенички прашања на 31 декември, министерот за внатрешни работи Оливер Спасовски одговарајќи на прашањето на Илија Димовски обелодени нови детали за незаконски издаваните лични карти. Тој рече дека стотици незаконски издавани лични карти на жители од Пустец биле пронајдени и во Ресен и Кичево.

Случајот со фалсификуваните лични карти го обелодени министерот Спасовски, по доаѓањето на функцијата прв човек во МВР, кој рече дека во времето на министерката Гордана Јанкуловска биле издадени 424 лажни лични карти на лица од Пустец, кои подоцна гласале во општина Центар, притоа покажувајќи документи и листи од лажните гласачи.

Тој исто така информираше и дека тие биле сместувани во станови за кои се утврдило дека биле во државна сопственост каде според документацијата се воделе по 20 до 30 луѓе.
Спасовски рече и дека постојат и официјални писмени изјави на вработени во министерството и во управните служби дека биле принудувани да издаваат фалсификувани лични карти по наредба на претпоставени и тоа во време пред изборите.

ВМРО-ДПМНЕ пак обвинува дека СДСМ имала блиски врски со еден од осомничените. Сепак остана нејасно зошто лицата кои прво беа приведени во врска со овој случај потоа беа пуштени на слобода.
За таканаречениот случај фабрика за афери собранието донесе одлука да се формира Анкетна комисија на иницијатива на владејачката ВМРО-ДПМНЕ.