Претседателот на Алијансата за иднината на Косово, Рамуш Харадинај изјави дека неколку пати се обидел да го советува премиерот Албин Курти за улогата на САД во склучувањето договор со Србија за взаемно признавање, но дека Курти не ја разбира улогата на Америка во тој процес.
„Косово е независна и суверена држава, признаена од угледни држави, има свои институции и армија. Во оваа фаза имаме можност да склучиме договор за меѓусебно признавање со Србија, што би го отворило патот на нашата земја да стане членка на НАТО и на други меѓународни организации. Иако неколку пати се обидов да го советувам премиерот, раководството на нашата земја не успеа да ја разбере важноста на американската улога во овој процес“, напиша Харадинај на Фејсбук.
Харадинај додаде дека вчера разговарал за овој витален процес за Косово.
„Изразив целосна доверба и во нашите стратешки сојузници и изразив загриженост за неспособноста и неуспехот на косовската влада во економската и енергетската сфера. Косово мора да преземе многу внимателни чекори во координација со своите сојузници, бидејќи одлуките што се носат сега ќе влијаат не само на нашата генерација, туку и на генерациите што доаѓаат“, заклучи Харадинај.