Албанскиот министер за надворешни работи Ферит Хоџа ја потврди волјата на Албанија за реформи поврзани со членството во ЕУ на средбата со еврокомесарот за проширување Марта Кос, објави АТА.
Хоџа се сретна со Кос вчера за време на неговата прва официјална посета на Брисел откако ја презеде функцијата. Тој ја опиша средбата со еврокомесарот за проширување како одлична можност да го потврди она што го нарече невиден напредок на Албанија на нејзиниот пат кон Европската Унија, објавија медиумите.
Според албанскиот министер за надворешни работи, овој напредок се рефлектира во темпото и квалитетот на процесот на преговори со ЕУ, како и во длабоките и сеопфатни реформи што се преземаат во албанските институции и општество. Тој додаде дека патот напред за Албанија е јасен, но и поамбициозен од кога било.
„Албанија останува целосно посветена на одржување на овој моментум и спроведување на нашите заеднички и амбициозни работни планови (со ЕУ) за процесот на пристапување со истата решителност што го водеше нашиот напредок досега. (…) нашата агенда останува фокусирана, значајна и насочена кон иднината“, рече Хоџа. Тој додаде дека Албанија не штеди никаков напор и не губи време во исполнувањето на поставените одредници.
Албанскиот министер за надворешни работи, исто така, рече дека во време на зголемени геополитички предизвици, проширувањето на ЕУ повторно доби стратешка важност како клучен инструмент за ширење на стабилноста, просперитетот и демократските вредности низ целиот континент.
„Ова е и историски момент и тест за нашата колективна решителност да го исполниме ветувањето за обединета Европа. Албанија е подготвена да продолжи да ја игра својата улога со решителност, одговорност и непоколеблива посветеност на европскиот проект“, рече Хоџа.
За време на состанокот, комесарот Кос истакна дека ја цени волјата и сериозноста со која Албанија ги исполнува своите обврски во рамките на процесот на европска интеграција во време кога процесот на проширување останува процес базиран на заслуги и реални резултати.
За време на неговата дводневна посета на Брисел вчера, Хоџа се сретна и со високата претставничка на Европската Унија за надворешни работи и безбедносна политика, Каја Калас.