Иако електричните автомобили се многу поеколошки од конвенционалните автомобили, ниту еден автомобил не е навистина „ослободен“ од издувни гасови, особено кога се зема предвид неговото производство. Сепак, тим од студенти од Холандија се обидува да се доближи што е можно поблиску до таа цел.
Станува збор за студенти од Технолошкиот универзитет во Ајндховен, кои го развија ZEM, односно Zero Emissions Vehicle. Овој автомобил е најблиску до нула емисии досега, што значи дека се користат нови технологии за производство и движење на автомобилот со цел да се намали влијанието на планетата.
„Овој автомобил е развиен за да ги минимизира емисиите на CO2 во фазата на производство, фазата на употреба и фазата на крајот на животот“, рече Јенс Лахаије, член на тимот од споменатиот универзитет.
Во производството на автомобилот користена е рециклирана пластика, која се обликувала по потреба со помош на 3Д принтер. Ова ги вклучува панелите на шасијата и каросеријата и гарантира дека практично нема отпад благодарение на употребата на рециклирани материјали.
Сепак, еден дел од автомобилот привлекува посебно внимание, поточно посебен филтер кој „фаќа“ CO2 додека возилото се движи. Тимот тврди дека автомобилот може да собере до 2 kg CO2 на секои 20.000 километри. Студентите признаваат дека не се работи за огромно количество CO2, бидејќи би биле потребни десет такви автомобили за да ја заврши работата на едно дрво. Меѓутоа, доколку филтерот се користи масовно, влијанието би било значително. Сега тим од студенти сака да го патентира својот филтер.
Во иднина, овие филтри би можеле лесно да се „празнат“ на станиците за полнење на батериите на електричните автомобили. Засега, филтерот се полни многу брзо и треба да се празни на секои 200 милји (320 километри), но тимот бара помош од автомобилската индустрија за да помогне да се постигне целта.