Христијан Мицкоски денеска повторно излажа, порачаа денеска од СДСМ.
После седум години постојан раст на просечната плата, посочуваат од опозициската партија, во јули годинава има пад за речиси 1.000 денари, според официјалните податоци од Државниот завод за статистика. Тоа се фактите.
„Просечната месечна исплатена нето-плата по вработен, во јули годинава изнесувала 40.961 денар и е за 1.000 денари пониска од јуни кога изнесуваше 41.939 според податоците од Државниот завод за статистика“, укажуваат од опозициската партија.
Потсетуваат дека СДСМ во изминатите години ја зголеми просечната плата до над 41.000 денари, а дека во времето на ДПМНЕ просечната плата беше на половина, едвај 20.000 денари. Во 2015 година, во времето на ВМРО-ДПМНЕ просечната плата изнесуваше 20.853 денари.
„Платата постојано растеше со СДСМ со години наназад, во 2020 година просечната плата беше 28.294 денари, во 2022 година беше 34.364 денари а во 2024 година достигна над 41.000 денари. Тоа е таа разлика. Дојде ВМРО-ДПМНЕ и Мицкоски и платите почнаа да паѓаат“, истакнуваат од СДСМ.
Според опозициската партија платите се намалуваат, а цените остануваат високи и растат. „Со вакви погрешни економски политики на Мицкоски стандардот на граѓаните само ќе опаѓа“.