Деновиве бројни австриски, германски и словенечки медиуми пишуваа дека Хрватска станала прескапа за одмор.
Одморот на Јадранот чини илјада евра неделно по човек, пресметале во еден австриски дневен весник. Словенците на ТВ ПОП јавуваат дека рестораните и продавниците поскапеле, а германските статистичари наведуваат дека Шпанија, Португалија и Грција се поевтини од Хрватска.
„Секоја година секоја туристичка земја која се обидува да ги мотивира своите граѓани да останат во нивната земја или друга земја се обидува да ги привлече од директен конкурент, како нас, тогаш имате разни натписи во медиумите. Некогаш се цените, некогаш рибите, некогаш ајкулите, некогаш морето… Конкуренцијата ќе ја искористи секоја можност да добие предност“, изјави за РТЛ министерот за туризам Тончи Главина.
Угледниот австриски портал „Хојте“ пишува дека „цените експлодирале во Хрватска“.
Во Лошињ двајца од Виена јаделе првокласна риба, две блитви, помфрит, испиле три алкохолни пијалоци и шише минерална вода. Тие наведуваат дека за среќа го проголтале последното парче храна кога дошла сметката бидејќи во спротивно ќе се задавеле. Платиле 148 евра и 75 центи.
„На многу пазари, во претходните години, Хрватска се доживуваше како евтина дестинација за масовен туризам. Ниту сме дестинација за масовен туризам, ниту сме биле, ниту сакаме да бидеме. И секако сакаме да бидеме многу конкурентни“, додава Главина, пренесува N1.