Две години по презентацијата на атрактивниот електричен модел Ioniq 5 N со кој Hyundai влезе во друштвото на компании кои нудат електрични автомобили со високи перформанси, на Фестивалот на брзината во Гудвуд, беше претставен нов производ од N дивизијата на Hyundai, скриен зад името Ioniq 6 N.
Одговорот на Hyundai на слично дизајнираните модели предводени од Taycan на Porsche сега е на врвот на гамата Ioniq 6, а вториот електричен модел зад кој стои N дивизијата (која е одговорна за спортските модели и тркачките активности на јужнокорејската компанија) повторно носи два електрични мотори кои заедно произведуваат 610 коњски сили и 740 Nm вртежен момент.
Меѓу интересните „играчки“ на моделот со интегрален погон се два системи. Првиот се нарекува N Grin Boost, а возачот ќе може да смета на 650 коњски сили и 770 Nm вртежен момент за десет секунди. Системот N Launch Control е одговорен за забрзување од 0 до 100 km/h за 3,2 секунди, а 6 N престанува да забрзува кога брзинометарот ќе го покаже бројот 260.
Одделот N се погрижи луксузниот потенцијал на „шестката“ со дополнително зацврстената и аеродинамично оптимизирана каросерија да биде на соодветни „нозе“, па автомобилот доаѓа со суспензија со електронско контролирани амортизери и системот N Torque Distribution кој се грижи за оптимална распределба на вртежниот момент. За забава во соодветна средина, тука е и системот N Drift, а саундтракот е обезбеден од системот N Active Sound.
Просторот под продолжените браници е исполнет со црни 20-инчни бандажи со гуми Pirelli P Zero со димензии 275/35, а ефикасното сопирање е обезбедено со црвени сопирачки клешти кои „фаќаат“ дискови со дијаметар од 399 mm (напред) и 358 mm (назад).
Според WLTP нормите, капацитетот на батеријата (84 kWh) е доволен за Ioniq 6 N да помине до 468 километри со едно полнење. Автомобилот ќе биде достапен во шест бои на каросеријата, а со компонентите што ги нуди одделот N, клиентите ќе имаат и можност за персонализација. Цената и почетокот на продажбата сè уште не се објавени.