Американската економија забележа силен квартален раст од 3% во вториот квартал од 2025 година, според прелиминарните податоци, што е над очекувањата на аналитичарите и претставува голем пресврт во споредба со падот од 0,5% во претходниот квартал, објави денес Бирото за економски анализи (BEA).
Резултатот за вториот квартал ги надмина очекувањата на аналитичарите на FactSet кои очекуваа економски раст од 2%.
Клучниот придонес за растот беше падот на увозот и закрепнувањето на потрошувачката на домаќинствата, иако ефектите од царинската политика на американскиот претседател Доналд Трамп се уште се присутни, објавува CNBC.
Увозот во САД се намали за дури 30,2%, што претставува целосен пресврт во споредба со првиот квартал кога порасна за речиси 38%. Во тоа време, компаниите брзаа да купуваат пред воведувањето на новите американски царини.
Дополнително, извозот во САД остана стабилен во споредба со претходниот квартал, што позитивно придонесе за билансот на надворешна трговија.
Потрошувачката на домаќинствата, која сочинува околу 70% од американската економија, порасна за 1,4% по скромните 0,5% во првите три месеци од годината, што се толкува како знак за отпорност на потрошувачката и покрај неизвесностите во глобалната трговија.
Во исто време, инфлацијата покажа знаци на олабавување – основниот индекс на PCE порасна за 2,1%, додека таканаречената базична инфлација изнесуваше 2,5%, што е пониско од претходниот квартал.
Трамп веднаш реагираше на најновите податоци за инфлацијата и, во објава на неговата социјална мрежа Truth Social, ги повика Федералните резерви на САД (ФЕД) да ги намалат каматните стапки, пренесува Танјуг.
ФЕД вечерва одлучува за својата монетарна политика и се очекува да ги задржи своите референтни каматни стапки во опсег од 4,25 до 4,5 проценти.