Денес, Иницијативниот одбор за вонреден конгрес во ВМРО ДПМНЕ, испрати соопштение до јавноста во кое вели дека постојано конфузно и неодговорно се однесува актуелниот лидер на партијата, Христијан Мицкоски, за чија смена се организира и овој Иницијативен одбор.
„Се уште актуелниот претседател на ВМРО-ДПМНЕ Христијан Мицкоски е конфузен и постојано зборува различни работи во зависност од ситуацијата и соговорникот. Тоа што Мицкоски нема автентична политика и често ги менува ставовите се одразува на неговиот личен рејтинг, а што е уште поважно ја влече партијата надолу.
На 10 Јули, пет дена пред изборите кога мислеше дека има некаква поддршка за да победи и да формира влада, го призна сменетото име на институциите.
„Ние би биле лицемери ако ја игнорираме реалноста. Како и секогаш, велам дека не можеме да ја игнорираме реалноста, бидејќи учествуваме на избори и сме дел од влада на која стои новата придавка. Имаме учесник во таа Влада со новата придавка и зема плата. Би бил лицемерен, ако кажам дека тоа не е така. Ќе излезеам несериозен ако речам дека ова е фикција, а ВМРО-ДПМНЕ е сериозна партија“, изјави тогаш Мицкоски во интервју на Телма.
Сега, седум месеци подоцна Мицкоски се обидува да ја игнорира реалноста која што ја признаваше и да испраќа писма до Собранието не прифаќајќи го променетото име.
„Владиното мнозинство не ја прими граѓанската иницијатива за одложување на пописот кој е очигледен фалсификат. Изговорот е дека не постоела институцијата Собрание на Република Македонија. Кој се плаши и бега од сопствениот народ срамно завршува.“ напиша Мицкоски пред неколу дена на неговиот фејсбук профил.
Дали Мицкоски лажел во јули кога се надевал на поддршка од меѓународната заедница велејќи дека ја признава новата реалност или лаже сега кога не ги признава новите официјални имиња на институциите?
ВМРО-ДПМНЕ и делегатите кои го избраа заслужуваат Мицкоски да им објасни кога лажел. Дали станува збор за тенденциозна манипулација или станува збор за политички дилетантизам кој го препознава јавноста. ВМРО-ДПМНЕ не смее повеќе да биде заложник на манипулациите на Мицкоски.
Неопходно е сплотување на партиските структури преку вонреден конгрес и искрена дискусија за причините за сите порази со кои се соочивме овие три години. Иницијативата ги повикува сите делегати кои гласаа за Мицкоски да дојдат на 28 Март на Вонредниот 17-ти Конгрес во Скопје и да дискутираат за иднината на ВМРО-ДПМНЕ.
ВМРО-ДПМНЕ веќе не смее да си го дозволи луксузот и да загуби нови изборни циклуси, оставајќи ги проблемите и нерасчистените прашања под тепих„ , стои во објавата на одборот задолжен за организација на вонреден конгрес во редовите на ВМРО ДПМНЕ.