Инвеститорите се враќаат на пазарите во Турција и имаат инвестирано повеќе од 30 милијарди долари во земјата од мај 2023 година бидејќи веруваат дека тамошната економија закрепнува на крилата на рестриктивната монетарна политика на министерот за финансии, Мехмед Шимшек.
Компанијата за управување со средства „Амунди“ пред само неколку месеци ги предупреди инвеститорите да се држат настрана од турските обврзници, но сега верува дека земјата се движи во вистинската насока благодарение на реформите што ги спроведува тим технократи под претседателот Реџеп Таип Ердоган, пишува Блумберг.
Странската сопственост на турски акции и обврзници сега е на највисоко ниво во последните пет години, а инвеститорите веруваат дека турската економија станува постабилна, додава њујоршката агенција.
Турската централна банка овој месец објави дека враќа депозит од 5 милијарди долари од Саудиска Арабија, сигнализирајќи им на аналитичарите дека Анкара е уверена во нејзината способност да ги обнови девизните резерви.
Веста дојде само неколку дена откако „Мудис“ го зголеми кредитниот рејтинг на Турција за прв пат по повеќе од една деценија.
И покрај оптимизмот, некои аналитичари предупредуваат дека Турција има уште долг пат да помине, бидејќи земјата се уште има една од највисоките стапки на инфлација во светот, а одлуките на претседателот Ердоган, кој моментално стои зад своите финансиски експерти, може да бидат непредвидливи.
„Ќе биде потребно извесно време. Економскиот тим на Турција доста добро управува со политичките и пазарните притисоци и ние сме среќни што сме позитивни на фиксниот приход и капиталот“, рече шефот на „Амунди“ за пазари во развој Јерлан Сиздиков, пренесе Танјуг.