Иран започна со изградба на нова нуклеарна централа на западот од земјата под називот Карун, чиј капацитет ќе биде 300 мегавати енергија, изјави денеска шефот на Организацијата за атомска енергија на Иран (АЕОИ) Мохамад Еслами.
„Започнати се работите за изградба на нуклеарната централа Карун, а склучени се и договори за внатрешна изградба на инфраструктурата и набавка на опрема за електраната. Планираме да инвестираме најмалку пет милијарди долари во екстракција на радиоактивни материјали во провинцијата Западен Азербејџан. Капацитетот на новата нуклеарна централа ќе биде 300 мегавати“, рече Еслами.
Во моментов во Иран работи само една нуклеарна централа во Бушер, која се гради со помош на Русија. Првиот блок на нуклеарната централа, завршен со учество на Москва, беше поврзан со националниот енергетски систем на Иран во септември 2011 година.
Во тек е изградбата на вториот блок и потпишан е договор за изградба на третиот блок, чија изградба официјално започна есента 2019 година.
Медиумите претходно објавија дека Иран планира да изгради пет нуклеарни централи до 2041 година.