Група од 39 ирански парламентарци апелирале до Врховниот совет за национална безбедност на земјата со барање да се разгледа одбранбената доктрина на земјата и конкретно, да се дозволи производство на нуклеарно оружје поради закана од израелски напад, објави новинската агенција ИСНА, повикувајќи се на член на парламентарната комисија за култура Хасан – Али Ехлаки.
„Денес ниту една меѓународна организација, дури ни европските и американските држави, не можат да го контролираат Израел. Врз основа на ова, 39 парламентарци испратија писмо до Врховниот совет за национална безбедност и го потпишаа, предлагајќи Советот да ја ревидира одбранбената доктрина на Исламската Република Иран“, рекол Ехлаки, пренесе иранската агенција.
Тој посочил дека, без оглед на забраната во рамките на исламскиот закон за развој и употреба на нуклеарно оружје, за која зборувал врховниот лидер на Иран, Али Хамнеи, таа сепак може да се ревидира.