Жените кои ќе го прекршат исламскиот кодекс на облекување ќе бидат казнети, изјави во понеделникот шефот на иранското правосудство, Голамхосеин Мохсени Еџеи, објави државната новинска агенција ИРНА, потврдувајќи го законот по неколкумесечни немири кои доведоа до смртоносна акција од страна на безбедносните сили.
„Соблекувањето на хиџабот е еднакво на покажување непријателство кон Исламската Република и нејзините вредности. Луѓето кои ќе направат ваков ненормален чин ќе бидат казнети“, рече Еџеи.
„Со помош на судските и извршните власти, владата ќе ги искористи сите расположливи средства за да се справи со луѓето кои соработуваат со непријателот и го прават овој грев што му штети на јавниот ред“, рече тој.
Смртта на иранската Курдка Махса Амини на 16 септември додека беше во полициски притвор поради кршење на правилата за облекување, предизвика протести низ целата земја во еден од најтешките предизвици за иранската теократија од нејзиното формирање во 1979 година.
Сè поострите репресии од безбедносните сили во голема мера ги задушија немирите во последните недели, пишува „Ројтерс“.