Во Хрватска почна денеска полициската, како и истрагата на Агенцијата за истражување на несреќи во воздушниот, поморскиот и железничкиот сообраќај, на местото на вчерашната несреќа на авионот „Cirrus 20“ во Капела.
Така било одлучено бидејќи, како што изјави синоќа за Хина главниот воздухопловен истражител Данко Петрин, многу подобро е истрагата да се спроведе на бел ден и додаде дека „за жал, на жртвите и така не може да им се помогне“.
Петрин вели дека во својата работа не наишол на ваква драстична несреќа на Cirrus 20, но дека овој тип на авион спаѓа во категоријата Cessna, односно во категоријата авиони до четири лица, а такви несреќи има многу.
-Истрагата за авионската несреќа треба да се спроведе на овој начин, освен на начинот на кој полицијата го прави тоа за да ја утврди вината или одговорноста на поединци за да ги гони, бидејќи со точното расветлување на причината за несреќа, може да се дадат безбедносни препораки, со цел во иднина да се спречат вакви несреќи – рече Петрин.
Спасувачите на терен ги пронашле остатоците од авионот нешто по 19:15 часот во шумската област Мали Маковник на планината Капели во округот Лика-Сењ.
Засега нема официјална потврда колку луѓе имало во авионот и дали сите загинале, но Хина неофицијално од пожарникарите кои трагаат дознава дека во авионот наводно имало тројца Холанѓани и дека и регистрациите на авионот се холандски.
Сè започнало во саботата во 12:30 часот кога хрватската контрола на летање забележала дека авионот што летал од Марибор за Пула исчезнал од радарот, а за исчезнувањето веднаш бил известен Оперативниот центар за цивилна заштита на Управата за цивилна заштита, по што е извршена потрага.