Претседателот Ѓорге Иванов уште вчера го добил указот за Законот за употреба на јазиците, но не се знае дали ќе го потпише или ќе го искористи правото на вето. Од неговиот кабинет велат дека тој одлуката ќе ја донесе согласно законски предвидениот рок.
Доколку претседателот не го потпише указот, законот ќе се врати во собраниска процедура и пратениците ќе треба повторно да го разгледуваат и да гласаат за него. Разгледувањето ќе биде во фаза на трето читање во рок од 30 дена од денот на негово донесување.
Во оваа фаза, пратениците ќе може да поднесуваа амандмани само за она на што укажал Иванов. За да биде изгласан повторно законот ќе бидат потребни мнозинството гласови од вкупниот број пратеници, а Иванов ќе биде должен да го потпише указот. Рокот кој сега го има претседателот за да одлучи дали ќе потпише или не е седум дена.
Пратениците вчера со 69 гласа „за“ го изгласаа законот, а неизвесноста за тоа каква ќе биде одлуката на претседателот доаѓа и по критиките кој тој ги упати во неговото годишно обраќање во Собранието на 26 декември минатата година.
– Реформаторот можеби е во право за она што е погрешно, но, не секогаш е во право за она што е правилно. Едно од тие прашања е Законот за употреба на јазиците. Со овој закон, заради краткорочни политички поени се доведуваат во прашање трајните интереси на Република Македонија и македонскиот народ. Прво, барањето за двојазичност е апсолвирано со амандманот 5 од Уставот, кој произлезе од Рамковниот договор, каде се регулира прашањето за службениот јазик во Република Македонија – рече Иванов.