Израелскиот министер за одбрана Израел Кац во понеделник изјави дека ѝ наредил на војската да подготви план за спроведување мерки против Иран по 12 дена воздушни операции.
Планот, рече Кац, вклучува „зачувување на израелската воздушна супериорност, спречување на иранскиот напредок во нуклеарниот развој и производството на ракети и одговор на иранската поддршка за терористички активности насочени против Израел“, објави Ројтерс.
Нападот на Израел врз Иран започна на 13 јуни со израелско бомбардирање на иранските нуклеарни постројки, како и напади врз други поврзани локации, на кои Иран одговори со бомбардирање на израелските градови, а на 25 јуни беше воспоставен прекин на огнот, со посредство на американскиот претседател Доналд Трамп.
Во тој период, најмалку 606 лица беа убиени, а повеќе од 5.000 беа повредени во Иран, според Министерството за здравство на земјата, додека најмалку 28 лица беа убиени, а 3.238 повредени во Израел во истиот период.