Јапонија официјално ги укина трговските привилегии за Русија

Јапонија денеска официјално го укина трговскиот статус на Русија како „најповластена нација“ со засилување на санкциите против земјата поради нејзиниот напад врз Украина.

Одземањето на трговските привилегии за Русија е последниот потег на Јапонија против Москва и е една од мерките од поширокиот список на санкции објавени од премиерот Фумио Кишида минатиот месец, вклучувајќи ја и одлуката за протерување на осум руски дипломати и трговски службеници.

Денешната одлука на јапонскиот парламент да ги укине трговските привилегии за Русија, заедно со другите санкции што ги воведе Јапонија колективно со други земји, се очекува да го зголеми притисокот врз Москва, но може да предизвика и одмазда од страна на Кремљ.