Денеска, во својот годишен извештај за одбраната, Јапонија предупреди на ескалација на заканите за националната безбедност.
Меѓу предупредувањата се и последиците од руската војна во Украина, кинеското заплашување на Тајван и нестабилните синџири на снабдување со технологија, пренесува „Ројтерс“.
Годишната Бела книга за одбраната објавена од владата на премиерот Фумио Кишида ги наведува Кина, Русија и Северна Кореја како главни безбедносни предизвици.
Во извештајот, исто така, се истакнува дека нападот на Москва врз Украина е „сериозно кршење на меѓународното право“ и изразува загриженост дека руската употреба на сила за решавање на спорот е преседан што ја загрозува безбедноста на соседен Тајван, кој Пекинг го смета за своја територија. Јапонскиот министер за одбрана Нобуо Киши минатиот месец ја опиша моменталната ситуација, велејќи дека неговата земја е на линијата на фронтот опкружена со актери вооружени со нуклеарно оружје.
Извештајот ги прикажува безбедносните грижи на владата додека подготвува буџетски предлог за невидено зголемување на военото финансирање, кое планира да го удвои во следните 10 години, наведува британската агенција.
Тоа, исто така, претставува основа за преглед на стратегијата за национална безбедност на крајот на годината, која се очекува да бара набавка на ракети со поголем дострел, зајакнување на вселенските и сајбер способностите и построга контрола на пристапот до технологијата, пренесува „Ројтерс“.