Јапонскиот премиер Шигеру Ишиба изјави дека финансиската состојба на неговата земја е полоша од онаа на Грција, отфрлајќи ги повиците за намалување на даноците во време кога трошоците за задолжување растат.
Ишиба рече дека не смета оти е добра идеја да се финансираат намалувањата на даноците преку државни обврзници, само неколку дена откако беше објавено дека економијата на Јапонија се намалила за прв пат за една година – и со побрзо темпо од очекуваното – како резултат на трговските политики на американскиот претседател Доналд Трамп.
Опозициските партии вршат притисок врз премиерот да ги намали даноците, вклучително и данокот на потрошувачка.
Според податоците објавени минатата недела, јапонскиот БДП се намалил за 0,7 проценти во првиот квартал од оваа година, додека средната пазарна прогноза беше пад од 0,2 проценти.
„Важно е да се препознаат ризиците на општеството и светот во кој постојат каматни стапки. Владата не коментира за нивото на каматните стапки, но реалноста е дека живееме во свет со нив. Фискалната состојба на нашата земја е несомнено исклучително лоша – полоша отколку во Грција“, рече премиерот во обраќањето пред парламентот во понеделник.
„Јапонија се соочува со транзиција во зона на позитивни каматни стапки, додека состојбата на јавните финансии е лоша“, предупреди тој, додавајќи дека растечките трошоци за финансирање на веќе огромниот национален долг стануваат сериозен проблем. „Иако даночните приходи растат, растат и расходите за социјална помош.“
Според Меѓународниот монетарен фонд, долгот на општата влада на Јапонија изнесувал 234,9 проценти од бруто домашниот производ во 2025 година, додека во Грција тој удел изнесувал 142,2 проценти.
Сепак, Јапонија успеа да избегне фискална криза каква што доживеа Грција во 2009 година, бидејќи домашните инвеститори го држат поголемиот дел од јапонскиот државен долг, а земјата сè уште има значителни побарувања за странски имоти и се смета за голем глобален доверител.
Министерот за финансии Кацунобу Като изјави дека Јапонија во моментов нема проблем со собирање средства преку емисија на долг, но дека мора да ја одржи довербата на пазарот во јавните финансии.
„Губењето на довербата на пазарот во нашите финансии би можело да доведе до нагло зголемување на каматните стапки, слабеење на јенот и прекумерна инфлација, што сериозно би ја погодило економијата“, рече Като за време на истата парламентарна седница.
Падот на БДП се припишува на стагнацијата на приватната потрошувачка и падот на извозот, што укажува дека јапонската економија ја губи поддршката во надворешната побарувачка дури и пред Трамп да објави големи тарифи за увоз од речиси сите главни трговски партнери на почетокот на април.
Јапонија се соочува со закана од царини од најмалку 24 проценти почнувајќи од јули ако не успее да постигне трговски договор со Вашингтон.
Покрај тоа, САД веќе воведоа царина од 25% за увоз на автомобили, челик и алуминиум, што дополнително ја потресе јапонската економија, која во голема мера се потпира на извозот на автомобили во Америка. Јапонските производители на автомобили веќе ги чувствуваат ефектите од овие мерки.