Јелена Ѓоковиќ смета дека статусот на нејзиниот сопруг Новак меѓу обичните луѓе е далеку поважен од бројните титули најдобар тенисер во историјата на „белиот спорт“.
„Кога гледаме што се случува во светот, тенисот е толку мала призма на животот, но на луѓето им носи среќа, радост и надеж. Сакам да го гледам како шампион на обичниот човек, а не на богатиот, бидејќи тој е обичен човек кој потекнува од многу скромно семејство на работници и сонувачи. Патувајќи низ светот, гледате многу луѓе кои се инспирирани од неговата приказна, бидејќи и тие се слични на него“, изјави Јелена во опширното интервју за аргентинскиот „Насион.
„Тенисот е многу луксузен спорт кој речиси исклучиво се поврзува со богатите луѓе. Сепак, навивачите на Новак се нормални луѓе со нормална работа и не можат секогаш да си дозволат билети за неговите натпревари. Затоа, кога ќе одите по улица и ќе видите работници на градилиште или во која било гранка, тие викаат: „Еј, Новак!“ Сите го запираат. Мислам дека ти дава сила и енергија да продолжиш. Иако веќе има постигнато се, мислам дека најголема победа му е тоа што е народен шампион. Да… Тој е народен шампион“, истакна Јелена Ѓоковиќ.