Јужна Африка ќе ја прекине употребата на вакцината против „Ковид-19“ на „АстраЗенека“ како дел од својата програма за вакцинирање, откако податоците покажале дека обезбедува минимална заштита од лесна до умерена инфекција предизвикана од доминантната варијанта на коронавирус во таа земја
Министерката за здравство, Звели Мкхизе изјави денес дека владата, по разочарувачките резултати во студијата спроведена од Универзитетот во Витватерсранд, ќе почека за совет од релевантни научници за тоа како најдобро да се справат со веќе добиените дози на вакцината, пишува Ројтерс.
Јужна Африка доби милион дози вакцини од „АстраЗенека“ произведени во Индија во понеделникот, а властите прво имаа намера да ги вакцинираат здравствените работници со неа.
Наместо тоа, тие ќе бидат вакцинирани со вакцини „Џонсон и Џонсон“ и „Фајзер“ во текот на следните неколку недели, а експертите ќе размислат што да прават со веќе добиените дози на вакцината „АстраЗенека“.
„Што значи ова за нашата програма за вакцинација, за која рековме дека ќе започне во февруари? Одговорот е дека ќе продолжи. Очекуваме да добиеме вакцини „Џонсон и Џонсон“ и „Фајзер“ од следната недела до следните четири недели. Значи, таа ќе биде достапна за здравствените работници“, рече Мкхизе.
„Ние ќе ја зачуваме вакцината „АстраЗенека“ додека експертите не одлучат што понатаму да прават“, додаде тој.