Една жена од Јужна Африка родила десет бебиња. Тоа може да биде нов светски рекорд, објави Би-Би-Си.
Сопругот на Госијама Тамара Ситола изјави дека биле изненадени од уште две бебиња бидејќи претходно на ултразвук виделе само осум од нив.
„Седум момчиња и три девојчиња. Среќен сум. Јас сум емотивен. Не можам да зборувам многу“, изјави сопругот Тебохо Котечи за „Преторија њуз“.
Еден јужноафрикански службеник ја потврди веста за Би-Би-Си, но друг рече дека сè уште не ги виделе бебињата.
Претставници на Гинисовата книга на рекорди за Би-Би-Си изјавија дека го испитуваат случајот со г-ѓа Ситола.
Жена која роди осум бебиња во САД во 2009 година во моментов го држи Гинисовиот рекорд за најмногу бебиња родени истовремено.
Минатиот месец, 25-годишната Халима Сисе од Мали роди девет бебиња кои добро напредуваат на клиника во Мароко.
Повеќето бремености со голем број бебиња завршуваат предвреме. Раѓања со повеќе од три бебиња се ретки и главно се резултат на третман со вештачко оплодување, но во овој случај парот тврди дека нивните бебиња биле зачнати природно.