Високиот претставник на Европската Унија за надворешни работи и безбедносна политика, Каја Калас, денеска изјави дека не може да замисли земјите од ЕУ да создадат посебна армија, како што неодамна побара европскиот комесар за одбрана Андриус Кубилиус.
„Секоја европска земја има армија, а армиите на 23 земји се исто така дел од структурата на НАТО, па затоа не можам да замислам земјите да создадат посебна „европска армија“. Значи, ова мора да бидат армии што веќе постојат, па затоа мора да видиме како тоа функционира во пракса“, изјави Калас пред новинарите во Брисел пред состанокот на министрите за надворешни работи, објави Ројтерс.
Комесарот за одбрана на Европската Унија, Андриус Кубилиус, изјави на почетокот на јануари дека ЕУ треба да размисли за формирање постојана армија од 100.000 војници и фундаментална реформа на политичките процеси што ја регулираат одбраната.
„Разбирливо е дека во војската мора да имате многу јасен синџир на команда, така што кога ќе се случи нешто, да биде јасно кој на кого му дава наредби. Ако создадеме паралелни структури, тоа само ќе ја замагли сликата“, додаде Калас.
Порано оваа недела, генералниот секретар на НАТО, Марк Руте, ги отфрли повиците од некои водечки европски политичари за формирање посебна европска армија, поради зголемените тензии околу Гренланд и интересот на американскиот претседател Доналд Трамп, САД да го анектираат арктичкиот остров, кој е автономна данска територија.