„Бугарија продолжува да ја поддржува идејата за интеграцијата на земјите од Западен Балкан во европската структура, но тоа не може да биде безусловно и без исполнување на договорите кои што се направени помеѓу Бугарија и соседните Балкански држави“, цели вицепремиерот Красимир Каракачанов.
Каракачанов зборуваше во парламентот пред тамошните избраници и информираше за релацијата со Северна Македонија, преговарачката рамка и евентуалното начело на преговорите со соседите за членство во Европската унија. Вицепремиерот уверува дека бугарската Влада се придржува кон потпишаниот договор за пријателство и добрососедство и рамковната позиција, којашто е потврдена со декларација од страна на бугарскиот парламент.
„Прво, никој не изврши притисок врз бугарската влада. Во моментов, германското претседателство само ја искажа позицијата да биде медијатор, доколку е потребно, за разговори меѓу двете земји. Немало притисок врз бугарската влада. Второ – во разговорите со претставниците на Република Северна Македонија Бугарија го потврди својот јасен став дека сме „за“ членството на Македонија во ЕУ, но веруваме дека договорот од 1 август 2017 година не се спроведува како што налагаат неговите одредби “, рече Каракачанов и даде пример со застојот на работата на историската комисија и публикациите на антибугарските медиуми.
Без надминување на говорот на омраза, без јасна ревизија на образовниот систем заснован на лажни факти, Каракачанов е категоричен, дека нема начин Бугарија да се согласи да ја закаже првата меѓувладина конференција за започнување преговори за пристапување на Република Северна Македонија кон ЕУ.
„За жал, владејачката коалиција во Скопје верува дека откако ќе ја отвориме вратата за НАТО, Бугарија може да биде под притисок или од други политички причини да се согласи да ја укине својата рамковна позиција од минатата година и декларацијата на парламентот. Од наша страна, постојано беше објаснувано дека владата нема намера и не може да ја прескокне одлуката на бугарскиот парламент, бидејќи Бугарија е парламентарна република. За нас, прашањето останува отворено “, додаде вицепремиерот.
Каракачанов во вторникот даде и кратка хронологија на настаните околу неодамнешните разговори со македонската делегација.
„Тие траеја долго, од утро до доцна попладне. Следниот ден, среда, имаше онлајн конференција на која присуствувавме Екатерина Захариева и јас како вицепремиери овластени да ги водиме овие разговори. Тие имаа претставници на исто ниво. Не дојдовме до никаква нова одлука поради неподготвеноста на нашите колеги од Скопје да ги прифатат изјавите многу јасно поставени во бугарската рамковна позиција “, им рече на пратениците Красимир Каракачанов.