Соединетите Американски Држави се најголемиот примател на кинеската кредитна активност во светот, според нова студија која го следи меѓународното задолжување обезбедено од Пекинг и покажува дека Кина сè повеќе позајмува на побогатите земји, а не на земјите во развој.
Извештајот на истражувачкиот центар AidData на американскиот државен универзитет Вилијам и Мери наведува дека од 2000 до 2023 година, Кина пласирала вкупно 2,2 трилиони долари во кредити и грантови во 200 земји, објави Ројтерс.
Иако долго време се сметаше за клучен кредитор на земјите во развој преку иницијативата „Појас и пат“, Кина сега сè повеќе го насочува финансирањето кон развиените економии, особено во стратешката инфраструктура и високотехнолошките синџири на снабдување, вклучувајќи полупроводници, вештачка интелигенција и чиста енергија.
AidData наведува дека портфолиото на кредити на Кина е всушност два до четири пати поголемо од претходните проценки и дека Кина останува најголемиот официјален кредитор во светот. Повеќе од три четвртини од кинеското кредитирање сега оди во земјите со среден и висок приход.
Според извештајот, Соединетите Американски Држави добиле најмногу официјални заеми од Кина – повеќе од 200 милијарди долари за речиси 2.500 проекти и активности, објавува „Банкар“. Кинеските државни компании се присутни „во секој дел и сектор на Соединетите Американски Држави“, финансирајќи проекти за течен природен гас (LNG) во Тексас и Луизијана, центри за податоци во Северна Вирџинија, терминали на аеродромите ЏФК и ЛАКС, како и гасоводот Матерхорн и нафтоводот Дакота Аксес.
Пекинг, исто така, финансирал аквизиции на високотехнолошки фирми, додека кинеските државни заемодаватели обезбедиле кредитни линии за многу компании од листата „Форчун 500“, вклучувајќи ги „Амазон“, „АТ&Т“, „Веризон“, „Тесла“, „Џенерал Моторс“, „Форд“, „Боинг“ и „Дизни“.
Уделот на кредитирање на земјите со ниски и средни приходи се намали од 88 проценти во 2000 година на 12 проценти во 2023 година. Во исто време, уделот на кредитирање на земјите со средни и високи приходи се зголеми од 24 проценти во 2000 година на 76 проценти во 2023 година. Обединетото Кралство, на пример, доби 60 милијарди долари, а Европската Унија 161 милијарда долари.