Кинеското министерство за трговија денеска соопшти дека Кина и ЕУ се согласиле за потребата од упатства за кинеските извозници на електрични возила во блокот.
Министерството соопшти дека ЕУ ќе објави документ во кој ќе бидат наведени плановите за минимални цени за електрични возила „на објективен и фер начин, следејќи го принципот на недискриминација и во согласност со релевантните правила на Светската трговска организација“.
Пекинг го поздрави пробивот како доказ за подготвеност за решавање на билатералните прашања преку дијалог и обезбедување „здрав развој“ на економските и трговските односи.
Кина и ЕУ се во спор околу електричните возила откако Европската унија го обвини Пекинг дека обезбедува „нефер“ субвенции за домашните производители, давајќи им предност во однос на европските производители.
Блокот воведе компензаторни давачки за увоз на електрични возила од Кина во декември 2024 година.