Кина е подготвена да ги продлабочи „пријателските и соработничките“ односи со Авганистан, изјави портпаролката на кинеската влада откако талибанците ја презедоа контролата врз земјата.
Пекинг се обидува да одржува неофицијални врски со Талибанците по објавувањето на американското повлекување од Авганистан, што го охрабри напредокот на тврдокорните движења низ целата земја и нивното заземање на главниот град Кабул во неделата.
Кина има 76 километри долга и недостапна граница со Авганистан.
Пекинг долго време се плашеше дека Авганистан може да стане појдовна точка за ујгурските сепаратисти во чувствителниот пограничен регион Ксинџијанг.
Меѓутоа, талибанската делегација на највисоко ниво се состана со кинескиот министер за надворешни работи Ванг Ји во Тијанџин минатиот месец, ветувајќи дека Авганистан нема да се користи како база за милитантите.
Кина, за возврат, ќе понуди економска поддршка и инвестиции за обнова на Авганистан.
Денес, Кина ја „поздрави“ можноста за продлабочување на врските со Авганистан, земја која веќе со децении е од геостратешка важност за големите сили.
„Талибанците во неколку наврати изразија надеж дека ќе развијат добри односи со Кина и се уште се надеваат на учество на Кина во реконструкцијата и развојот на Авганистан“, изјави за новинарите портпаролката на Министерството за надворешни работи, Хуа Чунинг.
– Го поздравуваме тоа. Кина го почитува правото на авганистанскиот народ самостојно да одлучува за својата судбина и е подготвена да продолжи да развива пријателски и кооперативни односи со Авганистан, рече таа.
Хуа ги повика Талибанците да „обезбедат безболна транзиција“ на власта и да го исполнат ветувањето дека ќе преговараат за формирање „отворена и инклузивна исламска влада“ и да ја обезбедат безбедноста на авганистанските и странските граѓани.
Кинеската амбасада во Кабул останува во функција, рече Хуа, иако Пекинг почна да ги евакуира кинеските граѓани од земјата неколку месеци порано, среде влошената безбедносна ситуација, пренесе АФП.