Два од најголемите холивудски филмови за суперхерои во моментов – „Black Panther: Wakanda Forever“ и „Black Adam“ – најверојатно нема да бидат прикажани во Кина, дознава Hollywood Reporter.
Кина е втор најголем кино-пазар во светот, но поради цензурата што е на сила овие два филма ќе останат без десетици милиони долари заработка.
На пример, првиот дел од „Black Panther“ заработи 105 милиони долари во Кина, исто како што филмовите на Двејн Џонсон беа огромни хитови во нивните кина.
Од финансиска гледна точка, одлуката да не се објави „Black Panther: Wakanda Forever“ на големото платно во Кина е изненадувачка со оглед на одличните резултати од претходните филмови на „Марвел“.
Друг пример – филмот „Avengers: Endgame“ само во Кина заработил 629 милиони долари. Меѓутоа, во меѓувреме, филмовите на Марвел „Шенг-Чи и легендата за десетте прстени“ (2021) и „Вечни“ (2021) се забранети од кино салите. Се верува дека причина за тоа биле изјавите на актерот Симу Лиу и режисерката Клои Жао, кои во претходните години ја критикуваа ситуацијата во Кина.
Не беше прикажан ниту последниот дел од „Спајдермен““, а постои сомневање дека причината е прикажувањето на Статуата на слободата, што е неприфатливо за кинеските цензори бидејќи ги симболизира американските политички вредности.
Што се однесува до филмот „Black Panther: Wakanda Forever“, се верува дека филмот ќе биде забранет во Кина поради прикажување на хомосексуална врска помеѓу два лика, имено воинот Ваканда Анека (Микаела Коле и телохранителката Ајо (Флоренс Касумба).
Од истите причини, филмот „Thor: Love and Thunder“ не се прикажуваше во Кина.
Во последниве години, Холивуд најмногу се обидуваше да попушти пред кинеските барања и ги отстрануваа хомосексуалните сцени од филмовите.
Многу е кажано за фактот дека во филмот „Боемска рапсодија“ исчезнаа сите референци за хомосексуалноста на Фреди Меркјури. Или како две реченици, кои алудираат на истото, беа испуштени од „Фантастични ѕверови: Тајната на Дамблдор“.
Но, „Волт Дизни“, кој е сопственик на „Марвел“, неодамна одлучи дека нема да отстранува хомосексуална содржина од своите филмови, без разлика од каде доаѓаат таквите барања.
Што се однесува до филмот „Black Adam“, се претпоставува дека причината за забраната е тоа што во филмот глуми Пирс Броснан, кој пред околу две години објави фотографија стара 19 години од себе и неговото семејство со Далај Лама, а Броснан му честиташе по повод 85. роденден. За кинеските власти, Далај Лама е опасен сепаратист и сите оние кои го поддржуваат, како Лејди Гага, Ричард Гир и Киану Ривс, не се добредојдени во Кина со нивниот имиџ и постапки.