Во интервју за „Vanity Fair“, Никол Кидман зборуваше за необичните барања на режисерот Стенли Кјубрик на сетот на неговиот последен филм, Eyes Wide Shut.
Заедно со Том Круз, со кој во тоа време беше во брак, Кидман играше една од главните улоги во контроверзниот филм на Кјубрик од 1999 година.
Eyes Wide Shut е психолошка драма што го следи угледниот лекар Вилијам (Том Круз), кој живее во Њујорк со сопругата Алис (Никол Кидман) и ќерката Хелена.
Откако неговата сопруга му открива дека некогаш размислувала за прељуба, Вилијам се инфилтрира во таен култ кој прави оргии.
Снимањето на филмот траело петнаесет месеци бидејќи Кјубрик бил перфекционист и сакал сите сцени да бидат совршени.
Според LADbible, Кидман и Круз морале да повторат некои од сцените по 50 пати.
Покрај тоа, режисерот им поставил на актерите детални прашања за нивната врска, како и за проблемите и стравовите со кои се соочуваат.
„Том слушна работи што не сакаше да ги слушне“, се сеќава Кидман.
„Тоа не беше како психотерапија бидејќи не те праша: „Како се чувствуваш за врската?“ Беше искрено, на моменти брутално искрено“.
Актерката рече дека морала да снима една кратка експлицитна сцена шест дена.
Станува збор за сцена во која Вилијам ја замислува Алис како има секс со друг маж.
На Круз не му било дозволено да биде на сетот за време на снимањето на таа сцена, а Кјубрик ја замолил Кидман да не му кажува што се случува на сетот.
По некое време линијата помеѓу фикцијата и реалноста почнала да исчезнува.
Актерите спиеле во спалните соби на нивните ликови, ја фрлале облеката на подот, а Круз почнал да остава ситни пари покрај креветот, што го правел и дома.
„Како актер, треба да си кажете дека постои реалност и дека има преправање“, рече Кидман.
„Тие линии понекогаш се прекрстуваат, а тоа се случува кога работите со режисер кој дозволува такво нешто. Многу е возбудливо кога ќе се случи такво нешто, но е и страшно во исто време“, заклучила Никол Кидман.