Две климатски активистки во Обединетото Кралство во понеделникот ги обоија зборовите „1,5 е мртов“ на гробот на Чарлс Дарвин во Вестминстерската опатија, мислејќи на критичниот климатски праг што светот привремено го помина во 2024 година.
„Го надминавме прагот од 1,5 степени што требаше да не заштити. Милиони се раселени, Калифорнија гори, а ние изгубивме три четвртини од целиот див свет од 1970-тите“, се вели во соопштението на Just Stop Oil, според Си-Ен-Ен.
Научниците минатата недела потврдија дека 2024 година била најтоплата година забележана и првата календарска година што ја исполнила клучната климатска цел – ветувањето да се ограничи глобалното затоплување на 1,5 степени над просечните температури пред луѓето да почнат да согоруваат големи количини на фосилни горива.
Минатата година беше потопла за 1,6 степени Целзиусови, покажуваат новите податоци објавени во петокот од европската агенција за мониторинг на климата Коперник.
Научниците се повеќе загрижени за достигнување 1,5 степени во текот на децении, наместо поединечни години, бидејќи над тоа ниво, луѓето и екосистемите се борат да се прилагодат. Но, тие велат дека рекордот од 2024 година е уште еден алармантен знак за тоа каде се движи планетата.
Демонстрантите се осврнаа и на кризата со биолошката разновидност.
„Дарвин би се превртувал во својот гроб кога би знаел дека сме во средината на шестото масовно истребување“, велат активистите кои бараат од британската влада да работи на постепено укинување на екстракцијата и согорувањето на фосилните горива до 2030 година.
Некои научници велат дека влеговме во шестото масовно истребување, со огромен број видови избришани во криза предизвикана од луѓето, кои уништија живеалишта и предизвикаа климатска криза.
Снимките објавени од Just Stop Oil покажуваат две активистки – 66- и 77-годишна – како седат со скрстени нозе на подот во близина на гробот на Дарвин, за кој Just Stop Oil вели дека го насликале со креда во спреј, материјал кој не е токсичен и се пере.
Полицијата изјави за Си-Ен-Ен дека две жени биле уапсени под „сомнение дека предизвикале криминална штета со, како што се верува, боја во прав во Вестминстерската опатија“.
Just Stop Oil организираше неколку протести како одговор на климатската криза во последниве години, вклучително и фрлање супа од домати над „Сончогледите“ на Ван Гог и прскање портокалова боја во прав врз Стоунхенџ.