Климатските промени ќе доведат 200 милиони Африканци до тежок глад, ќе ги намалат приходите од земјоделските култури за 30 отсто и ќе го намалат просечниот бруто домашен производ по глава на жител за 7,1 отсто, покажува новата студија.
Студијата на Центарот за глобален развој, Социоекономското влијание на климатските промени во земјите во развој во следните децении (The Socioeconomic Impact of Climate Change in Developing Countries in The Next Decades), покажува дека светот во развој ќе го сноси најголемиот дел од влијанието на затоплувањето на светот.
Додека „умерена економска загуба“ ќе има до 2050 година, по тој датум влијанието ќе биде значајно и Африка ќе биде најтешко погодена.
„Доколку не се реши заканата од климатските промени, социо-економските проблеми на земјите во развој, особено во Африка, ќе ги продлабочат и ќе ги еродираат придобивките направени во развојот во последните децении“, напиша авторот Филип Кофи Адом од Јужноафриканскиот универзитет во Витвотерсранд.